TNPSC குரூப் 2 / 2A தேர்வு – முழு வழிகாட்டி (பாடத்திட்டம், தேர்வு முறை, முதன்மைத் தேர்வு, படிப்புத் திட்டம்) | Group 2 & 2A Syllabus, Exam Pattern, Mains & Study Plan

TNPSC குரூப் 2 / 2A (Combined Civil Services Examination-II) என்பது பட்டப்படிப்புத் தகுதியுள்ள பதவிகளுக்கான தேர்வு; இரண்டுக்கும் பொதுவான முதல்நிலைத் தேர்வு (200 வினாக்கள், 300 மதிப்பெண்கள், 3 மணி நேரம்) ஒரு வடிகட்டும் தேர்வு மட்டுமே; அதன் மதிப்பெண் இறுதித் தரவரிசையில் சேராது. அதன் பிறகு குரூப் 2-க்கும் 2A-க்கும் தனித்தனி முதன்மைத் தேர்வுகள் நடைபெறுகின்றன; இரண்டுக்கும் நேர்முகத் தேர்வு (Interview) இல்லை – தாள் I தமிழ்த் தகுதித் தேர்வு, இறுதித் தெரிவு தாள் II மதிப்பெண் அடிப்படையில் மட்டுமே (குரூப் 2-இல் விரிவான விடை எழுதும் (Descriptive) பொது அறிவுத் தாள், 2A-இல் கணினி வழிக் கொள்குறி வகை (CBT, Objective) தாள்).

குரூப் 2 / 2A – 2026 அறிவிக்கை ஒரே பார்வையில்

அறிவிக்கையின்படி பணியிட எண்ணிக்கை தற்காலிகமானது; முதல்நிலைத் தேர்வு முடிவு வெளியாகும் வரை மாறலாம். அப்படி மாறினால், அடுத்த நிலைகளுக்கு அனுமதிக்கப்படுவோர் எண்ணிக்கையும் அதற்கேற்ப மாறும். நுழைவுச் சீட்டு (Hall Ticket), தேர்வு மையம் போன்ற விவரங்களுக்கு tnpsc.gov.in தளத்தில் வரும் அறிவிப்புகளைத் தொடர்ந்து பாருங்கள்.

குரூப் 2-க்கும் குரூப் 2A-க்கும் என்ன வேறுபாடு?

முன்பு குரூப் 2 பதவிகள் “நேர்முகத் தேர்வு உள்ள பதவிகள்” (Interview Posts) என்றும், குரூப் 2A பதவிகள் “நேர்முகத் தேர்வு இல்லாத பதவிகள்” (Non-Interview Posts) என்றும் அழைக்கப்பட்டன. அது பழைய முறை. 07/2026 அறிவிக்கையின்படி குரூப் 2, குரூப் 2A இரண்டுக்குமே நேர்முகத் தேர்வு இல்லை; தேர்வு முதல்நிலை, முதன்மை என இரண்டு நிலைகள் மட்டுமே. முதன்மைத் தேர்வின் தாள் II மதிப்பெண் அடிப்படையில் தரவரிசைப் பட்டியல் வெளியிடப்படும். அதன் பிறகு:

1. இணையவழிச் சான்றிதழ் சரிபார்ப்பு (Onscreen Certificate Verification) – பொதுப் பிரிவு 1:3, இடஒதுக்கீட்டுப் பிரிவுகள் 1:2 விகிதத்தில்.
2. நேரடிச் சான்றிதழ் சரிபார்ப்பும் கலந்தாய்வும் (Physical Certificate Verification & Counselling) – பொதுப் பிரிவு 1:3, இடஒதுக்கீட்டுப் பிரிவுகள் 1:1.5 விகிதத்தில்.
3. கலந்தாய்வில் தரவரிசைப்படி பதவி ஒதுக்கீடு.

இதே அறிவிக்கையில் குரூப் 2 பதவிக்குத் தேர்வானவர்கள் குரூப் 2A பதவிகளுக்குக் கருதப்படமாட்டார்கள்; 2A கலந்தாய்விலும் பங்கேற்க முடியாது. தாள் II மதிப்பெண் சமமாக இருந்தால் உயர் கல்வித் தகுதி உடையவர், அதுவும் சமமெனில் வயதில் மூத்தவர், அதுவும் சமமெனில் முன்னதாக விண்ணப்பித்தவர் தரவரிசையில் முன் வைக்கப்படுவர்.

இப்போதைய உண்மையான வேறுபாடு இரண்டு:

• பதவிகள்: குரூப் 2-இல் சார்பதிவாளர் நிலை II (Sub Registrar Grade II), துணை வணிகவரி அலுவலர் (Deputy Commercial Tax Officer), இளநிலை வேலைவாய்ப்பு அலுவலர் (Junior Employment Officer), நன்னடத்தை அலுவலர் (Probation Officer) போன்ற பதவிகள்; குரூப் 2A-இல் பல்வேறு துறைகளின் உதவியாளர் (Assistant), கணக்கர் (Accountant), முதுநிலை ஆய்வாளர் (Senior Inspector), செயல் அலுவலர் (Executive Officer) போன்ற பதவிகள்.
• முதன்மைத் தேர்வு தாள் II: குரூப் 2-க்கு விரிவான விடை எழுதும் தாள்; குரூப் 2A-க்குக் கணினி வழிக் கொள்குறி வகைத் தாள் (CBT). எனவே தயாரிப்பு முறையும் சற்று மாறுகிறது.

முழுப் பதவிப் பட்டியலும் பதவிக் குறியீடுகளும் (Post Code) 07/2026 அறிவிக்கையிலும் 7A கூடுதல் அறிவிக்கையிலும் உள்ளன. கூடுதல் அறிவிக்கை மூலம் குரூப் 2-இல் குழந்தைகள் நலன் மற்றும் சிறப்புச் சேவைகள் துறையின் நன்னடத்தை அலுவலர் (2 இடங்கள்), குரூப் 2A-இல் தொழிற் கூட்டுறவுச் சங்க மேற்பார்வையாளர் (Supervisor of Industrial Co-operatives, 10 இடங்கள்), குழந்தைகள் நலன் மற்றும் சிறப்புச் சேவைகள் துறையின் உதவியாளர் (3 இடங்கள்) ஆகியவை சேர்க்கப்பட்டன; தலைமைச் செயலக (நிதி) உதவியாளர் இடங்கள் 17 எனத் திருத்தப்பட்டன.

தகுதி – சுருக்கமாக (Eligibility)

• கல்வி: பெரும்பாலான பதவிகளுக்கு UGC அங்கீகரித்த பல்கலைக்கழகப் பட்டம்; சில பதவிகளுக்குக் குறிப்பிட்ட பட்டம் அல்லது கூடுதல் தகுதி தேவை. 2026 சுற்றில், தேர்ச்சி முடிவு அறிவிக்கை நாளான 11-08-2026 அன்றோ அதற்கு முன்போ வெளியாகியிருக்க வேண்டும்.
• வயது: 01-07-2026 நிலவரப்படி கணக்கிடப்படும். இடஒதுக்கீட்டுப் பிரிவுகளைச் சேராதோருக்கு (Others) பெரும்பாலான பதவிகளில் 32 வயது நிறைவடைந்திருக்கக் கூடாது. சில விதிவிலக்குகள்: துணை வணிகவரி அலுவலர் – சட்டப் பட்டதாரிகளுக்கு 34; செயல் அலுவலர் நிலை III (2A) – குறைந்தபட்சம் 25, அதிகபட்சம் 37; கூடுதல் அறிவிக்கையில் சேர்ந்த நன்னடத்தை அலுவலர் (குழந்தைகள் நலன் துறை) – குறைந்தபட்சம் 26, அதிகபட்சம் 42. இடஒதுக்கீட்டுப் பிரிவினருக்குப் பெரும்பாலான பதவிகளில் அதிகபட்ச வயது வரம்பு இல்லை (60 வயது நிறைவடையாமல் இருக்க வேண்டும்); ஆனால் துணை வணிகவரி அலுவலர் பதவிக்கு அவர்களுக்கும் வரம்பு உண்டு (37; சட்டப் பட்டதாரிகளுக்கு 39).

முதல்நிலைத் தேர்வு முறை (Prelims Exam Pattern)

12-12-2024 அன்று வெளியான திருத்தப்பட்ட பாடத்திட்டத்தின்படியும் 07/2026 அறிவிக்கையின்படியும் ஒரே தாள், மூன்று பகுதிகள்:

• குறைந்தபட்சத் தகுதி மதிப்பெண் அனைத்துப் பிரிவினருக்கும் 90 (300-க்கு).
• தவறான விடைக்கு மதிப்பெண் கழிவு இல்லை. ஆனால் எந்த வினாவையும் விடாமல் விடையளிக்க வேண்டும்: விடை தெரியாவிட்டால் OMR தாளில் [E] குமிழை நிரப்ப வேண்டும். விடை நிரப்பாமல் விடப்பட்ட வினாக்களுக்கான விதிகளை அறிவிக்கையின் இணைப்பு IV-இல் (OMR அறிவுரைகள்) கவனமாகப் படியுங்கள்.
• பொது அறிவு வினாக்கள் தமிழ், ஆங்கிலம் இரண்டிலும் அச்சிடப்பட்டிருக்கும் (முதன்மைத் தேர்விலும் இதே விதி).
• முதல்நிலை மதிப்பெண் இறுதித் தரவரிசையில் சேராது. குரூப் 2, குரூப் 2A ஒவ்வொன்றின் முதன்மைத் தேர்வுக்கும், இடஒதுக்கீட்டுப் பிரிவு வாரியாகப் பணியிடங்களைப் போல 10 மடங்கு (1:10) தேர்வர்கள் அனுமதிக்கப்படுவர்; வெட்டுமதிப்பெண்ணுக்குச் சமமான மதிப்பெண் பெற்ற அனைவரும் அனுமதிக்கப்படுவதால் இந்த எண்ணிக்கை 1:10-ஐத் தாண்டலாம்.

முதன்மைத் தேர்வு (Mains) – 07/2026 அறிவிக்கையின்படி

முக்கிய விதிகள்: தாள் I-இல் குறைந்தது 40 மதிப்பெண் பெற்றால் மட்டுமே தாள் II மதிப்பீடு செய்யப்படும்; இரண்டு தாள்களையும் எழுத வேண்டும்; ஏதேனும் ஒரு தாளை எழுதாதவர் தெரிவுக்குக் கருதப்படமாட்டார்; இறுதித் தெரிவும் தரவரிசையும் தாள் II மதிப்பெண் அடிப்படையில் மட்டுமே. மாற்றுத்திறனாளித் தேர்வர்கள் தாள் I (தமிழ்த் தகுதித் தேர்வு) எழுதுவதிலிருந்து விலக்குப் பெறலாம் – இதை இணைய விண்ணப்பத்திலேயே கோரி, மாற்றுத்திறன் சான்றிதழைப் பதிவேற்றியிருக்க வேண்டும்; பின்னர் கோருவது ஏற்கப்படாது. 2A தாள் II-க்குக் கணினி அறிவு தேவையில்லை, மவுஸ் இயக்கத் தெரிந்தால் போதும்; TNPSC இணையதளத்தில் உள்ள மாதிரித் தேர்வில் (Mock Test) முன்பே பழகிக்கொள்ளலாம்.

தாள் I – தமிழ்த் தகுதித் தேர்வு

07/2026 அறிவிக்கையின் பாடத்திட்டத்தில் (இணைப்பு III) தமிழிலிருந்து ஆங்கிலம், ஆங்கிலத்திலிருந்து தமிழ் மொழிபெயர்ப்பு, சுருக்கி வரைதல் (Precis), பத்தியைப் படித்துப் பதிலளித்தல் (Comprehension), குறிப்புகளை விரிவாக்குதல் (Hints Development), திருக்குறள் சார்ந்த கட்டுரை, அலுவல் கடிதம், தமிழ் மொழி அறிவு ஆகியவை இடம்பெற்றுள்ளன. இது தகுதித் தாள் மட்டுமே என்றாலும், இதில் தோல்வியுற்றால் தாள் II மதிப்பீடு செய்யப்படாது – அலட்சியம் வேண்டாம்.

குரூப் 2 தாள் II – விரிவான விடை

பாடத்திட்டத்தில் 7 அலகுகள்: தமிழ்நாட்டைச் சிறப்பாகக் குறிக்கும் நவீன இந்திய வரலாறு; தமிழ்ச் சமூகம் – பண்பாடு, மரபு; இந்தியச் சமூகப் பிரச்சினைகள்; வளர்ச்சியில் அறிவியலும் தொழில்நுட்பமும்; அரசியலமைப்பு, அரசியல், ஆளுகை; இந்தியப் புவியியல், சுற்றுச்சூழல், பல்லுயிர், பேரிடர் மேலாண்மை; இந்தியப் பொருளாதாரம். அறிவிக்கையின் இணைப்பு III-இல் உள்ள வினாத்தாள் அமைப்பு:

பொதுவாக விடைகளைத் தமிழ் அல்லது ஆங்கிலம் – ஏதேனும் ஒரே மொழியில் – எழுத வேண்டும்; மொழிபெயர்க்க முடியாத கலைச்சொற்களுக்கு மட்டும் விலக்கு. அனுமதிக்கப்படாத இடங்களில் இரு மொழிகளையும் கலந்து எழுதினால் விடைத்தாள் செல்லாததாக்கப்படும். அலகு II வினாக்களைத் தமிழிலோ ஆங்கிலத்திலோ எழுதலாம் எனப் பாடத்திட்டம் தனியாகக் குறிப்பிடுகிறது. மூன்று மணி நேரத்தில் ஏறத்தாழ 3,600 சொற்கள் எழுத வேண்டியிருப்பதால், நேரம் வைத்து எழுதும் பயிற்சி இன்றியமையாதது.

அலகு வாரியான உத்தி (Unit-wise Strategy)

முதல்நிலைத் தேர்வின் பகுதி A வினா எண்ணிக்கையே முன்னுரிமையைச் சொல்லிவிடுகிறது:

• அலகு V, VI – 40 வினாக்கள்: பகுதி A-வில் பாதிக்கு மேல் இவை. அலகு V-இன் தமிழ்நாடு நிர்வாகப் பகுதிக்கான விரிவான வழிகாட்டி எங்கள் கட்டுரைகள் பகுதியில் உள்ளது.
• பகுதி B – திறனறிவு (15) + காரணவியல் (10): சதவீதம், விகிதம், தனிவட்டி – கூட்டுவட்டி, பரப்பளவு, நேரம் – வேலை போன்றவற்றை நாள்தோறும் 10–15 கணக்குகளாகப் பயிற்சி செய்யுங்கள். 2A முதன்மைத் தேர்வின் தாள் II-இலும் பொது நுண்ணறிவும் காரணவியலும் பகுதி (50 வினாக்கள்) இருப்பதால் இது இரட்டிப்புப் பலன் தரும்.
• பகுதி C – பொதுத் தமிழ் (100): இலக்கணம் 25, சொல்லகராதி 15, எழுதும் திறன் 15, கலைச் சொற்கள் 10, வாசித்தல் – புரிந்துகொள்ளும் திறன் 15, எளிய மொழிபெயர்ப்பு 5, இலக்கியம் – தமிழ் அறிஞர்களும் தமிழ்த்தொண்டும் 15. அலகு வாரியான நுணுக்கங்களுக்குப் பொதுத் தமிழ் உத்திக் கட்டுரையைப் படியுங்கள்.

6 மாதப் படிப்புத் திட்டம் (முதல்நிலை + முதன்மை)

அடுத்த சுற்றுக்குப் புதிதாகத் தொடங்குவோருக்கான அட்டவணை இது. ஒவ்வொரு நாளும் பொதுத் தமிழுக்கு 1 மணி நேரம், நடப்பு நிகழ்வுகளுக்கு 30 நிமிடம் கட்டாயம்.

முதன்மைத் தேர்வுக்கு முதல்நிலை முடிவு வரை காத்திருக்க வேண்டாம். குரூப் 2 விரும்புவோர் மாதம் 3 முதலே வாரத்துக்கு ஒரு தலைப்பில் நேரம் வைத்து விடை எழுதிப் பழகுங்கள்; 2A விரும்புவோர் நேரம் வைத்துக் கொள்குறி வினாக்களை எழுதும் வேகத்தை வளர்க்க வேண்டும்.

01-11-2026 தேர்வு எழுதுவோருக்கு

இக்கட்டுரை எழுதப்பட்ட அக்டோபர் 2026 நடுப்பகுதியில் தேர்வுக்கு ஏறத்தாழ இரண்டு வாரங்களே இருந்தன. இந்தக் கட்டத்தில் புதிய நூல்களைத் தொடங்காமல், உங்கள் குறிப்புகள், PYQ, வாரத்துக்கு 2–3 முழு மாதிரித் தேர்வுகள் (காலை 9:30 – 12:30 நேரத்திலேயே) – இவற்றில் மட்டும் கவனம் செலுத்துங்கள்.

PYQ, இலவச வினாடி வினா, நடப்பு நிகழ்வுகள் – பயன்படுத்தும் முறை

• முதலில் PYQ: ஒரு அலகைப் படிக்கத் தொடங்கும் முன் அதன் பழைய வினாக்களைப் பாருங்கள்; எந்த ஆழத்தில் வினா வருகிறது என்பது தெரியும். பொதுத் தமிழுக்கு எங்கள் பொதுத் தமிழ் PYQ நூல் (3,867 வினாக்கள், விளக்கத்துடன், ₹149), அலகு V-க்கு தமிழ்நாடு நிர்வாகம் PYQ 2020–2026 நூல் (601 வினாக்கள், ₹149) பயன்படும்.
• இலவச வினாடி வினா: எங்கள் தமிழ் வினாடி வினாக்களிலும் தமிழ்நாடு நிர்வாகம் வினாடி வினாக்களிலும் ஒவ்வொரு வினாவுக்கும் சரியான விடையும் ஒரு வரி விளக்கமும் உண்டு. தினமும் படித்த பாடத்துக்கு ஒரு வினாடி வினா எழுதினால் நினைவில் நிற்கும்.
• நடப்பு நிகழ்வுகள்: இவை இப்போது அலகு V-இன் ஒரு பகுதி. எங்கள் தினசரி நடப்பு நிகழ்வுகளைத் (தமிழ்) படித்து, தமிழ்நாடு அரசுத் திட்டங்கள், குறியீடுகள், விருதுகள் ஆகியவற்றைத் தனிக் குறிப்பேட்டில் மாதவாரியாக எழுதுங்கள்.
• தவறுகளின் பதிவு: ஒவ்வொரு மாதிரித் தேர்வுக்குப் பிறகும் தவறிய வினாக்களை அலகு வாரியாகக் கணக்கிடுங்கள்; அடுத்த வாரப் படிப்பை அதை வைத்தே முடிவு செய்யுங்கள்.

தவிர்க்க வேண்டிய தவறுகள்

• பழைய தேர்வு முறையை நம்புதல்: நேர்முகத் தேர்வு, பழைய அலகு எண்கள் போன்ற பழைய தகவல்கள் இன்னும் சில தளங்களில் உள்ளன. அதிகாரப்பூர்வ அறிவிக்கையையும் 12-12-2024 பாடத்திட்டத்தையுமே பின்பற்றுங்கள்.
• முதல்நிலைக்கு மட்டும் படித்தல்: முதல்நிலை முடிவுக்கும் முதன்மைத் தேர்வுக்கும் இடையிலான இடைவெளி குறைவாக இருக்கலாம். எழுதும் பயிற்சியை முன்பே தொடங்குங்கள்.
• தமிழ்த் தகுதித் தாளைப் புறக்கணித்தல்: 40 மதிப்பெண் பெறாவிட்டால் தாள் II-இல் எவ்வளவு நன்றாக எழுதியிருந்தாலும் பயனில்லை.
• திறனறிவைக் கடைசிக்குத் தள்ளுதல்: கணக்குகள் வேகம் சார்ந்தவை; தினசரிப் பயிற்சியால் மட்டுமே வரும்.
• மாதிரித் தேர்வு இல்லாத படிப்பு: 200 வினாக்களை 3 மணி நேரத்தில் எழுதுவது தனித் திறன்; நேரம் வைத்துப் பயிற்சி செய்யுங்கள்.

குறிப்பு: இங்குள்ள விவரங்கள் TNPSC அறிவிக்கை 07/2026 (11-08-2026), கூடுதல் அறிவிக்கை 7A/2026 (03-09-2026), 12-12-2024 பாடத்திட்டம் ஆகியவற்றின் அடிப்படையிலானவை. எதிர்கால அறிவிக்கைகளில் தேர்வு முறை மாறக்கூடும் என்பதால், அடுத்த சுற்றுக்கு விண்ணப்பிக்கும்போது அந்த அறிவிக்கையையும் சரிபார்த்துக்கொள்ளுங்கள்.

சண்முகம் IAS அகாடமியில் பயிற்சி

கோயம்புத்தூர் காந்திபுரத்தில் (நகரப் பேருந்து நிலையம் எதிரில்) உள்ள எங்கள் தலைமையகத்திலும், மதுரை அண்ணா நகர் கிளையிலும் TNPSC தேர்வுகளுக்கு நேரடி (Classroom) மற்றும் இணையவழி (Online) வகுப்புகள் நடைபெறுகின்றன. கட்டண விவரம், புதிய பேட்ச் தேதிகளுக்கு கட்டணம் & பேட்ச் பக்கத்தைப் பாருங்கள் அல்லது அழையுங்கள்: கோயம்புத்தூர் – 99941 46662, மதுரை – 73059 47122. எல்லா நூல்களையும் படிப்புப் பொருள்கள் பக்கத்தில் காணலாம்.

அடிக்கடி கேட்கப்படும் கேள்விகள் (FAQ)

TNPSC குரூப் 2-க்கும் 2A-க்கும் என்ன வேறுபாடு?

இரண்டுக்கும் முதல்நிலைத் தேர்வு ஒன்றுதான்; முதன்மைத் தேர்வு தனித்தனி. தாள் II குரூப் 2-க்கு விரிவான விடை எழுதும் பொது அறிவுத் தாள், குரூப் 2A-க்குக் கணினி வழிக் கொள்குறி வகைத் தாள் (CBT); பதவிகளும் வேறுபடுகின்றன.

குரூப் 2 பதவிகளுக்கு இப்போது நேர்முகத் தேர்வு உண்டா?

இல்லை. அறிவிக்கை 07/2026-இன்படி குரூப் 2, குரூப் 2A இரண்டுக்கும் நேர்முகத் தேர்வு இல்லை; முதன்மைத் தேர்வின் தாள் II மதிப்பெண் அடிப்படையில் மட்டுமே தெரிவு. அதன் பிறகு சான்றிதழ் சரிபார்ப்பும் கலந்தாய்வும் நடைபெற்று, தரவரிசைப்படி பதவி ஒதுக்கப்படும்.

குரூப் 2 / 2A முதல்நிலைத் தேர்வில் எத்தனை வினாக்கள், தகுதி மதிப்பெண் என்ன?

200 கொள்குறி வகை வினாக்கள் (பொது அறிவு 75, திறனறிவு 25, பொதுத் தமிழ் அல்லது பொது ஆங்கிலம் 100), 300 மதிப்பெண், 3 மணி நேரம், OMR முறை. அனைத்துப் பிரிவினருக்கும் குறைந்தபட்சத் தகுதி மதிப்பெண் 90; பணியிடங்களைப் போல 10 மடங்கு (1:10) தேர்வர்கள் முதன்மைத் தேர்வுக்கு அனுமதிக்கப்படுவர்.

குரூப் 2A முதன்மைத் தேர்வின் தாள் II-இல் என்ன இருக்கும்?

கணினி வழிக் கொள்குறி வகைத் தாள் (CBT): பொது அறிவு (பட்டப்படிப்புத் தரம்) 150 வினாக்கள், பொது நுண்ணறிவும் காரணவியலும் (SSLC தரம்) 50 வினாக்கள் – மொத்தம் 200 வினாக்கள், 300 மதிப்பெண், 3 மணி நேரம். குறைந்தபட்சத் தகுதி மதிப்பெண் 90; தாள் I-இல் 40 பெற்றால் மட்டுமே இது மதிப்பீடு செய்யப்படும்.

TNPSC குரூப் 2 / 2A 2026 முதல்நிலைத் தேர்வு எப்போது, எத்தனை இடங்கள்?

அறிவிக்கை 07/2026-இன்படி முதல்நிலைத் தேர்வு 01-11-2026 அன்று காலை 9:30 முதல் மதியம் 12:30 வரை; முதன்மைத் தேர்வுத் தேதி முதல்நிலை முடிவுடன் அறிவிக்கப்படும். கூடுதல் அறிவிக்கை 7A/2026-க்குப் பிறகு குரூப் 2-இல் 43, குரூப் 2A-இல் 803 என மொத்தம் 846 இடங்கள் (தற்காலிக எண்ணிக்கை).